برطانیہ اور پاکستان کے تعلقات انتہائی مضبوط اور مثبت ہیں: برطانوی وزیرداخلہ

برطانوی وزیرِ داخلہ شبانہ محمود نے برطانیہ اور پاکستان کے تعلقات کو انتہائی مضبوط اور مثبت قرار دیتے ہوئے کہا ہے کہ دونوں ممالک کی حکومتیں مسلسل رابطے میں رہتی ہیں اور دوطرفہ تعاون کو مزید فروغ دیا جا رہا ہے۔

شبانہ محمود نے برطانوی امیگریشن سسٹم میں موجود سقم دور کرنے کو اپنی اولین ترجیح قرار دیتے ہوئے کہا کہ ماضی میں قانونی اور غیر قانونی دونوں طرح کے امیگرینٹس امیگریشن سسٹم کا استحصال کرتے رہے ہیں، جسے اب مؤثر اصلاحات کے ذریعے بہتر بنایا جا رہا ہے۔

انہوں نے کہا کہ برطانیہ میں بڑھتے ہوئے اسٹریٹ کرائمز پر قابو پانے کے لیے پولیس ریفارمز ناگزیر ہیں اور عوام کے تحفظ کے لیے سخت اقدامات کیے جا رہے ہیں۔

برطانوی وزیرداخلہ کا کہنا تھا کہ ان کی شناخت ایک برٹش، انگلش، برمنگھم کی رہائشی مسلمان خاتون کی ہے، جن کے والدین کا تعلق آزاد کشمیر سے ہے اور انہیں اپنی اس شناخت پر فخر ہے۔

شبانہ محمود نے ذاتی دلچسپیوں کا ذکر کرتے ہوئے بتایا کہ وہ پاکستانی کھانوں کی شوقین ہیں اور خود بھی اچھا کھانا بناتی ہیں۔ ان کی خاص ڈشز میں پالک گوشت اور قیمہ شامل ہیں، جبکہ ویک اینڈ پر گھر جانے پر وہ والدہ کے ہاتھ کے بنے کھانے شوق سے کھاتی ہیں۔