لندن: معروف گلوکاروں کے جعلی ریکارڈز بیچ کر لاکھوں کمانے والے شخص کو تین سال کی جیل

برطانیہ میں دنیا کے معروف اور عالمی شہرت یافتہ گلوکاروں کے نام پر جعلی ونائل (Vinyl) ریکارڈز تیار کر کے لاکھوں پاؤنڈز کمانے والے ملزم کو عدالت نے ساڑھے 3 سال قید کی سزا سنا دی ہے۔ 40 سالہ ریحان احمد پر الزام تھا کہ اس نے دی بیٹلز، ٹیلر سوئفٹ، ایڈ شیرن، ایڈیل، آریانا گرانڈے، ڈریک، بیونسے اور ریحانہ سمیت 108 سے زائد عالمی فنکاروں کی موسیقی کے جعلی ریکارڈز تیار کر کے مارکیٹ میں فروخت کیے۔

برطانوی حکام کے مطابق ملزم نے تقریباً 7 سال تک یہ غیر قانونی اور منظم کاروبار چلایا جس کے دوران اس نے 27 لاکھ پاؤنڈ سے زائد کا ناجائز منافع کمایا۔ یہ کیس اس وقت منظرِ عام پر آیا جب میوزک انڈسٹری کے نمائندوں نے خفیہ طور پر ملزم کے گودام سے کچھ ریکارڈز خریدے اور باریک بینی سے جانچ کے دوران ان کے جعلسازی پر مبنی ہونے کا انکشاف ہوا۔

بعد ازاں برطانوی پولیس نے لندن کے علاقے ایکٹن (Acton) میں واقع گودام پر چھاپہ مار کر 2 ہزار 791 جعلی ونائل ریکارڈز برآمد کیے، جسے پولیس حکام نے ایک ہی کارروائی میں جعلی ونائل ریکارڈز کی ملکی تاریخ کی سب سے بڑی برآمدگی قرار دیا۔ چھاپے کے دوران تقریباً 70 سال پرانی 4 ونائل پریس مشینیں، 3 ہزار دھاتی اسٹیمپرز، ہزاروں کی تعداد میں پرنٹ شدہ ریکارڈ کور اور لیبلز بھی قبضے میں لیے گئے، جبکہ تمام ضبط شدہ سامان کا مجموعی وزن تقریباً 18 ٹن تھا۔ حکام کا کہنا ہے کہ ملزم نے حالیہ برسوں میں ونائل ریکارڈز کی دوبارہ بڑھتی ہوئی عالمی مقبولیت کا فائدہ اٹھا کر یہ دھندا کھڑا کیا، جس سے فنکاروں، ریکارڈ لیبلز اور قانونی میوزک ڈسٹری بیوٹرز کو بھاری مالی نقصان پہنچا۔