ایران تنازع کے دوران امارات پر سائبر حملوں میں تیزی، ایک دن میں 6 لاکھ 40 ہزار حملے

خطے میں جاری ایران تنازع اور کشیدگی کے تناظر میں متحدہ عرب امارات (UAE) پر سائبر حملوں کی رفتار میں نمایاں اضافہ ریکارڈ کیا گیا ہے، جہاں حکام کے مطابق ایک ہی دن میں 6 لاکھ 40 ہزار سے زائد سائبر حملے کیے گئے۔ اماراتی سائبر سکیورٹی حکام کا کہنا ہے کہ حملہ آوروں نے ملک کے اہم ترین اسٹریٹجک شعبوں کو نشانہ بنایا جن میں پیٹرولیم، گیس، بجلی، پانی کی فراہمی اور بینکنگ سیکٹر شامل ہیں۔ صورتحال کی سنگینی کو دیکھتے ہوئے اماراتی سائبر سکیورٹی کونسل نے تمام سرکاری و نجی اداروں کو ہائی الرٹ رہنے کی سخت ہدایت جاری کی ہے۔

اماراتی حکام نے انکشاف کیا ہے کہ اس سے قبل رواں سال اپریل میں بھی سائبر حملوں کی یومیہ تعداد 8 لاکھ تک جا پہنچی تھی۔ ان کا کہنا تھا کہ جدید دور میں سائبر حملے باضابطہ جنگ کا ایک نیا اور خطرناک ہتھیار بن چکے ہیں، جبکہ حیرت انگیز طور پر 85 فیصد سے زائد حملے ملازمین یا صارفین کی جانب سے کسی مشکوک لنک یا ای میل پر غلط کلک کیے جانے کے باعث شروع ہوتے ہیں۔ کونسل نے اداروں کو خبردار کیا ہے کہ سائبر حملہ آور سسٹمز میں رسائی حاصل کرنے کے بعد کئی ماہ تک خاموش رہ کر نگرانی کر سکتے ہیں اور موقع ملتے ہی بڑا نقصان پہنچا سکتے ہیں، اس لیے تمام اداروں کو مسلسل چوکس رہنے اور حفاظتی اقدامات کو مزید سخت کرنے کی ضرورت ہے۔