ترکیہ کا پہلے قمری خلائی جہاز کی تیاری اور جوڑنے کا عمل مکمل

ترکیہ نے اپنے پہلے قمری خلائی جہاز کی تیاری، جوڑنے اور اسمبلی کا مرحلہ مکمل کر کے 3.5 میٹرک ٹن وزنی خلائی جہاز کو سخت ماحولیاتی تجربات کے لیے ‘ترک ایرو اسپیس انڈسٹریز’ (TAI) کے حوالے کر دیا ہے۔ ترکیہ کے وزیرِ صنعت و ٹیکنالوجی مہمت فاتح کاشر کے مطابق، اس خلائی جہاز کو 2027ء کے اوائل میں امریکہ کے کینیڈی اسپیس سینٹر سے خلا میں بھیجا جائے گا۔ خلائی جہاز کو چاند کے گرد 100 کلومیٹر بلند قطبی مدار میں پہنچنے میں تقریباً دو ماہ کا وقت لگے گا، جہاں یہ کم از کم تین ماہ اور ممکنہ طور پر ڈیڑھ سال تک شمسی ہواؤں، پانی کی موجودگی، مقناطیسی میدانوں اور سطح کی تابکاری پر سائنسی تحقیق انجام دے گا۔

اس تاریخی قمری مشن میں 80 فیصد پرزے اور ٹیکنالوجی مقامی سطح پر تیار کردہ ہیں، جن میں ترکیہ کا اپنا تیار کردہ ہائبرڈ پروپلشن سسٹم بھی شامل ہے جو چاند کے مدار میں پہنچنے اور آخری مرحلے میں سافٹ لینڈنگ کنٹرول کرنے کے لیے استعمال ہوگا۔ وفاقی وزیر نے کہا کہ اب تک دنیا کے صرف 8 ممالک نے کامیابی کے ساتھ قمری مشن بھیجے ہیں اور اس مشن کی کامیابی کے ساتھ ترکیہ چاند پر پہنچنے والا دنیا کا 9واں ملک بن جائے گا۔ انہوں نے مزید بتایا کہ ترکیہ نے ‘آرٹیمس معاہدے’ میں شمولیت کے ساتھ ساتھ اگلے مواصلاتی سیٹلائٹ ‘ترک سیٹ 7 اے’ کی تیاری اور ‘امیج-2’ و ‘امیج-3’ زمینی مشاہداتی سیٹلائٹس پر کام کا باقاعدہ آغاز کر دیا ہے۔