ترکیہ ایئر فورس کا لڑاکا طیارہ گرکر تباہ، پائلٹ جاں بحق

ترکیہ کے صوبے بالیکیسر میں فضائیہ کا ایک ایف-16 جنگی طیارہ گر کر تباہ ہو گیا ہے، جس کے نتیجے میں طیارے کے پائلٹ جامِ شہادت نوش کر گئے۔ ترک وزارتِ دفاع نے حادثے کی تصدیق کرتے ہوئے گہرے دکھ کا اظہار کیا ہے۔

طیارہ بدھ کی صبح بالیکیسر کے نویں مین جیٹ بیس سے اڑا تھا، لیکن پرواز کے کچھ ہی دیر بعد ریڈار سے اس کا رابطہ منقطع ہو گیا۔حادثے میں پائلٹ میجر ابراہیم بولات جاں بحق ہو گئے۔ سرچ اینڈ ریسکیو ٹیموں نے ہائی وے کے قریب ملبے سے ان کی میت برآمد کی۔ ترک وزارتِ دفاع نے حادثے کی فنی وجوہات کا تعین کرنے کے لیے ایک اعلیٰ سطحی تحقیقاتی کمیشن قائم کر دیا ہے۔ اس کے ساتھ ساتھ چیف پبلک پراسیکیوٹر کے دفتر نے بھی قانونی تحقیقات کا آغاز کر دیا ہے۔

ترک حکام کا کہنا ہے کہ ابتدائی طور پر حادثے کی وجہ فنی خرابی معلوم ہوتی ہے، تاہم حتمی رپورٹ کمیشن کی تحقیقات مکمل ہونے کے بعد جاری کی جائے گی۔