ٹرمپ کا ایران پر مزید دباؤ بڑھانے کا اعلان، نئی پابندیوں کا عندیہ

امریکی صدر ڈونلڈ ٹرمپ نے سوشل میڈیا پر ایک اہم بیان جاری کرتے ہوئے اعلان کیا ہے کہ امریکی فوج کی بے پناہ طاقت کی بدولت آبنائے ہرمز میں تیل کی ترسیل پہلے سے کہیں زیادہ روانی سے جاری ہے، تاہم ایران کی بندرگاہوں سے آنے یا جانے والے اور ایرانی کارگو لے جانے والے تمام بحری جہازوں پر مکمل ناکہ بندی نافذ کی جائے گی۔ صدر ٹرمپ نے امریکی وزیرِ دفاع (وزیرِ جنگ) پیٹ ہیگستھ، چیئرمین جوائنٹ چیفس آف اسٹاف جنرل ڈین کین اور سینٹ کام کے سربراہ ایڈمرل بریڈ کوپر کو خراجِ تحسین پیش کرتے ہوئے کہا کہ امریکی عسکری قیادت کی بدولت یہ اسٹریٹجک آبی گزرگاہ ایران کے علاوہ تمام ممالک کے جہازوں کے لیے کھلی ہوئی ہے۔ انہوں نے ایرانی قیادت کو سخت تنقید کا نشانہ بناتے ہوئے انہیں اپنے ملک کی تباہی کا ذمہ دار قرار دیا۔ مزید برآں، امریکی صدر نے انکشاف کیا کہ مشرقِ وسطیٰ کی قیادت سے کامیاب مذاکرات کے بعد انہوں نے مجوزہ 20 فیصد فیس کے بجائے خلیجی ممالک کے ساتھ بڑے تجارتی اور سرمایہ کاری کے معاہدوں کو ترجیح دی ہے، جس کے تحت امریکہ میں تاریخی پیمانے پر خلیجی سرمایہ کاری لائی جائے گی جو لاکھوں نئی اور اعلیٰ ملازمتوں کی تخلیق کا سبب بنے گی۔