بلوچستان میں ٹرین سروس مرمتی کام کے باعث ایک روز کیلئے معطل

بلوچستان میں ریلوے ٹریک پر ضروری مرمتی کاموں کے سلسلے میں ٹرین سروس ایک روز کے لیے معطل کر دی گئی ہے، جس کے باعث مسافروں کو شدید مشکلات کا سامنا کرنا پڑ رہا ہے۔ ریلوے حکام کے مطابق آج کوئٹہ سے پشاور جانے والی جعفر ایکسپریس کو مکمل طور پر منسوخ کر دیا گیا ہے جبکہ پشاور سے کوئٹہ آنے والی جعفر ایکسپریس کا روٹ جیکب آباد تک محدود کر دیا گیا ہے، اس کے علاوہ سریاب اور کچلاک کے درمیان چلنے والی جناح پیپلز ٹرین کی سروس بھی معطل رہے گی۔ ریلوے حکام نے مزید واضح کیا ہے کہ منسوخ ہونے والی ٹرینوں کے تمام مسافروں کو ان کے ٹکٹوں کی مکمل رقم واپس کر دی جائے گی۔