پی ٹی آئی رہنما کی نظربندی کا نوٹیفکیشن واپس، عدالت نے درخواست نمٹا دی

لاہور ہائیکورٹ نے پاکستان تحریکِ انصاف کے رہنما عثمان اکرم کی نظربندی کا نوٹیفکیشن واپس لیے جانے پر اس کے خلاف دائر درخواست نمٹا دی ہے۔ لاہور ہائیکورٹ کے جسٹس علی ضیا باجوہ نے پی ٹی آئی رہنما عثمان اکرم کی اہلیہ کلثوم عثمان اکرم کی جانب سے شوہر کی نظربندی کو چیلنج کرنے والی درخواست پر سماعت کی، جس میں عدالتی حکم پر ڈپٹی کمشنر لاہور پیش ہوئے اور نظربندی کا نوٹیفکیشن واپس لیے جانے سے متعلق رپورٹ عدالت میں جمع کرائی، جبکہ سرکاری وکیل نے بھی عدالت کو آگاہ کیا کہ عثمان اکرم کی نظربندی کا نوٹیفکیشن واپس لے لیا گیا ہے۔ اس موقع پر جسٹس علی ضیا باجوہ نے ریمارکس دیے کہ 26 ویں آئینی ترمیم کے بعد عدالت درخواست میں کی گئی استدعا سے باہر نہیں جا سکتی، جس کے بعد عدالتِ عالیہ نے نوٹیفکیشن واپس ہونے کی بنیاد پر درخواست نمٹا دی۔