اسلام آباد ہائیکورٹ کی عمران خان سے ملاقات کے بعد سیاسی گفتگو نہ کرنے کی ہدایت

اسلام آباد ہائیکورٹ نے 190 ملین پاؤنڈ کیس میں بانی پی ٹی آئی عمران خان اور بشریٰ بی بی کی اپیلوں پر سماعت کے حوالے سے دو صفحات پر مشتمل تحریری حکم نامہ جاری کرتے ہوئے ایڈووکیٹ جنرل کو عمران خان سے وکلاء کی ملاقات کرانے کی ہدایت کر دی ہے، جس کا دورانیہ ایک گھنٹے سے کم نہیں ہوگا۔ چیف جسٹس سرفراز ڈوگر اور جسٹس محمد آصف پر مشتمل دو رکنی بینچ کے حکم نامے میں کہا گیا ہے کہ عدالت توقع رکھتی ہے کہ انتہائی پیشہ ورانہ صلاحیتوں کے حامل وکلاء سلمان صفدر اور لطیف کھوسہ جیل میں ملاقات کے دوران اور اس کے بعد سیاسی معاملات پر گفتگو سے گریز کریں گے اور خود کو صرف قانونی امور تک محدود رکھیں گے۔ سماعت کے دوران لطیف کھوسہ نے مؤقف اختیار کیا تھا کہ ملاقات نہ ہونے کے باعث وہ دلائل نہیں دے سکتے، جبکہ سلمان صفدر کا کہنا تھا کہ انہیں اپیل پر دلائل کے لیے ہدایات مل چکی ہیں تاہم ملاقات کا دورانیہ کم تھا، جس پر عدالتِ عالیہ نے وکلاء کی استدعا منظور کرتے ہوئے دلائل کی تیاری کے لیے ایک ہفتے کا وقت دے دیا اور متعلقہ آفس کو اپیلوں کی پیپر بکس 7 روز میں تیار کرنے کی بھی ہدایت جاری کر دی۔