عالمی منڈی میں تیل کی قیمتیں مزید کم ہونے کا امکان

عالمی منڈی میں خام تیل کی قیمتیں ہفتہ وار بنیادوں پر مسلسل کمی کی جانب گامزن ہیں، جہاں برینٹ خام تیل کے سودے 95.41 ڈالر فی بیرل جبکہ ویسٹ ٹیکساس انٹرمیڈیٹ (ڈبلیو ٹی آئی) کے سودے 20 سینٹ کی کمی کے ساتھ 88.52 ڈالر فی بیرل پر ریکارڈ کیے گئے۔ عالمی میڈیا کے مطابق امریکی صدر ڈونلڈ ٹرمپ کے اس بیان کے بعد کہ ایران کے ساتھ کسی معاہدے کی ضرورت نہیں اور امریکا تیل کی ترسیل و تجارت پر سخت ناکہ بندی برقرار رکھے گا، مشرقِ وسطیٰ میں تیل کی سپلائی کو شدید متاثر کرنے والی کسی بڑی جنگ کے امکانات میں کمی آنے سے قیمتوں پر دباؤ کم ہوا ہے، جس کے نتیجے میں رواں ہفتے برینٹ کروڈ میں 2.4 فیصد اور ڈبلیو ٹی آئی میں 2.5 فیصد کمی متوقع ہے۔ ماہرین کا کہنا ہے کہ اگرچہ یمن کے حوثیوں کی جانب سے سعودی تنصیبات اور خلیجی آئل ٹینکرز کو نشانہ بنانے کے واقعات اور آبنائے ہرمز سے خام تیل کی ترسیل کو لاحق خطرات کے باعث مارکیٹ میں اتار چڑھاؤ برقرار ہے، تاہم گزشتہ دو ہفتوں کے دوران مجموعی گراوٹ مارکیٹ کے خطرات کے متوازن تخمینے کی عکاسی کرتی ہے۔