پاکستان منرلز فورم: غیر ملکی سرمایہ کاروں کا معدنی منصوبوں میں دلچسپی کا اظہار

اسلام آباد میں جاری پاکستان منرلز انویسٹمنٹ فورم 2026 کے دوسرے روز بھی غیر ملکی سرمایہ کاروں اور مندوبین نے پاکستان کے معدنی منصوبوں میں بھرپور دلچسپی کا اظہار کیا ہے، جبکہ اس اہم تقریب میں وزیراعظم شہباز شریف اور فیلڈ مارشل عاصم منیر بھی شریک ہیں۔ فورم سے خطاب کرتے ہوئے وزیرِ پٹرولیم علی پرویز ملک نے کہا کہ معدنی شعبے کی تیز رفتار ترقی کے لیے پبلک پرائیویٹ شراکت داری کو فروغ دیا جا رہا ہے اور معدنی وسائل تک آسان رسائی کی خاطر چاغی اور گوادر کے درمیان روڈ انفراسٹرکچر کی تعمیر جاری ہے، جبکہ وسائل کی درست نشاندہی کے لیے ڈیجیٹل میپنگ پر بھی خصوصی توجہ مرکوز کی گئی ہے۔ اس موقع پر وزیرِ تجارت جام کمال نے کہا کہ حکومت سرمایہ کاروں کو ہر ممکن سہولت فراہم کر رہی ہے اور 90 سے زائد ممالک کے ساتھ تجارتی روابط کی تفصیلات آن لائن پورٹل پر دستیاب ہیں جہاں سے کاروباری ادارے ترجیحی معاہدوں کے تحت ٹیرف اور ڈیوٹی رعایتوں سے فائدہ اٹھا سکتے ہیں۔ انہوں نے مزید کہا کہ جدید ٹیکنالوجی، اے آئی، قابلِ تجدید توانائی اور دفاعی شعبوں کے لیے اہم معدنیات بنیادی ضرورت ہیں، لہٰذا نایاب زمینی عناصر کے حصول کے لیے کان کنی سے لے کر سمیلٹنگ، پروسیسنگ اور ویلیو ایڈیشن تک پوری ویلیو چین پر باہمی ہم آہنگی کے ساتھ کام کرنا ہوگا۔