190 ملین پاؤنڈ کیس اپیلیں: اسلام آباد ہائیکورٹ نے بانی پی ٹی آئی سے وکلاء کی کم از کم ایک گھنٹہ ملاقات کرانے اور پیپر بکس 7 روز میں تیار کرنے کا حکم دے دیا

اسلام آباد ہائیکورٹ نے 190 ملین پاؤنڈ کیس میں بانی پی ٹی آئی اور بشریٰ بی بی کی اپیلوں کی سماعت سے متعلق دو صفحات پر مشتمل اہم تحریری حکم نامہ جاری کرتے ہوئے ایڈووکیٹ جنرل کو وکلاء کی بانی پی ٹی آئی سے ملاقات کرانے کی ہدایت کر دی ہے، جس کا دورانیہ کم از کم ایک گھنٹہ ہوگا۔ چیف جسٹس سرفراز ڈوگر اور جسٹس محمد آصف کی جانب سے جاری کردہ حکم نامے میں کہا گیا ہے کہ سماعت کے دوران لطیف کھوسہ نے ملاقات نہ ہونے کے باعث دلائل دینے سے معذوری ظاہر کی جبکہ سلمان صفدر نے مؤقف اختیار کیا کہ انہیں ہدایات مل چکی ہیں تاہم ملاقات کا دورانیہ کم تھا، جس پر عدالت نے دلائل کی تیاری کے لیے وکلاء کی استدعا منظور کرتے ہوئے ایک ہفتے کا وقت دے دیا اور رجسٹرار آفس کو 7 روز میں اپیلوں کی پیپر بکس تیار کرنے کا حکم دیا۔ عدالتِ عالیہ نے اپنے حکم نامے میں واضح کیا کہ سلمان صفدر اور لطیف کھوسہ انتہائی پیشہ ورانہ صلاحیتوں کے حامل وکلاء ہیں اور عدالت توقع رکھتی ہے کہ وہ جیل ملاقات کے بعد خود کو صرف قانونی معاملات تک محدود رکھیں گے اور سیاسی معاملات پر گفتگو نہیں کریں گے۔