پاسداران انقلاب کا بحرین میں امریکی ابتدائی وارننگ ریڈار تباہ کرنے کا دعویٰ

ایران کی پاسدارانِ انقلاب (آئی آر جی سی) نے دعویٰ کیا ہے کہ اس کی ایرو سپیس فورس نے جوابی کارروائی کرتے ہوئے بحرین میں امریکی فوج کا ابتدائی وارننگ ریڈار تباہ کر دیا ہے۔ پاسدارانِ انقلاب کی جانب سے جاری کردہ بیان کے مطابق یہ اقدام ایران کے جنوبی صوبے ہرمزگان کے علاقے سیریک میں ٹیلی کمیونیکیشن ٹاور پر دشمن کی فضائی جارحیت کے جواب میں اٹھایا گیا، جس کا مقصد جارح دشمن کو یہ واضح پیغام دینا ہے کہ وہ آبنائے ہرمز میں فضائی اشتعال انگیزی سے باز رہے، بصورتِ دیگر ایرو سپیس فورس دوبارہ حملے کی صورت میں بھرپور جوابی کارروائی کے لیے مکمل طور پر تیار ہے۔ قبل ازیں ایرانی سرکاری خبر رساں ادارے ’’ارنا‘‘ نے رپورٹ کیا تھا کہ آبنائے ہرمز کے قریب واقع انتہائی اسٹریٹجک اہمیت کے حامل صوبے ہرمزگان کے علاقے سیریک کو فوجی حملے کا نشانہ بنایا گیا ہے، تاہم اس حملے میں ہونے والے جانی و مالی نقصان کی تفصیلات سامنے نہیں آ سکیں۔