عدلیہ کے حال پر سندھ ہائی کورٹ نوٹس لے، عدالت کے فیصلوں پر سوالات اٹھا دیے: فاروق ستار

کراچی: ایم کیو ایم کے رہنما ڈاکٹر فاروق ستار نے عدالتی فیصلوں اور حالیہ عدالتی رویے پر شدید تحفظات کا اظہار کرتے ہوئے کہا ہے کہ عدالت کہہ رہی ہے کہ پاکستان بچا کر آئے یا تڑوا کر آئے، اور یہ بھی کہ دفعہ 144 کی خلاف ورزی دہشت گردی کیسے ہو سکتی ہے؟

میڈیا سے گفتگو کرتے ہوئے فاروق ستار نے کہا کہ عدالت کے مطابق گاڑیوں کو آگ لگانے کا کوئی ارادہ نہیں تھا، پھر بھی بغیر سنے فیصلہ سنا دیا گیا۔ انہوں نے کہا کہ عدالت کہتی ہے کہ ان کے خلاف ایف آئی آر کاٹنا جہالت ہے، انہیں گرفتار کرنا جہالت ہے، تو سوال یہ ہے کہ کسی کے دل و ارادے کو بھانپ کر عدالت فیصلہ کیسے کر سکتی ہے؟ایم کیو ایم رہنما نے کہا کہ عدلیہ کا رویہ کھلا ہونا چاہیے۔ عدالتی احترام اپنی جگہ لیکن موجودہ صورتحال پر سندھ ہائی کورٹ کو نوٹس لینا چاہیے۔فاروق ستار نے کہا کہ قانون نافذ کرنے والے اداروں کو چیلنج کیا گیا، گورنر سندھ کو دھمکیاں دی گئیں، اور وزیر اعلیٰ سندھ آئینی و قانونی طور پر اس معاملے کا نوٹس لیں۔ان کا کہنا تھا کہ عدالتی کارروائی کے طریقۂ کار اور حالیہ فیصلوں کے حوالے سے کئی سوالات جنم لے رہے ہیں جن کا سنجیدگی سے جائزہ ضروری ہے