ایران نے میزائل اور ڈرون کی پیداواری لائنیں زیر زمین منتقل کر دیں، پاسداران انقلاب

ایرانی پاسدارانِ انقلاب (IRGC) کے ترجمان بریگیڈیئر جنرل حسین محبی نے انکشاف کیا ہے کہ ایران نے اپنے تمام اہم میزائلوں اور ڈرونز (بغیر پائلٹ طیاروں) کی پیداواری لائنیں مکمل طور پر زیرِ زمین منتقل کر دی ہیں تاکہ کسی بھی ہنگامی یا عسکری صورتحال میں دفاعی ہتھیاروں کی تیاری کی رفتار متاثر نہ ہو۔

پریس کانفرنس سے خطاب کرتے ہوئے بریگیڈیئر جنرل حسین محبی نے بتایا کہ ایرانی پاسدارانِ انقلاب نے اپنے میزائل اور ڈرون پروگرام کے ڈھانچے کو اس جدید اور لچکدار انداز میں ترتیب دیا ہے کہ دشمن کی کوئی بھی ممکنہ عسکری کارروائی ملک کی دفاعی پیداواری صلاحیت پر اثر انداز نہیں ہو سکے گی۔ انہوں نے کہا کہ دشمن ماضی میں بھی ایران کی میزائل اور ڈرون صلاحیت کو نہیں روک سکا تھا اور اب زیرِ زمین تنصیبات کی بدولت اس تسلسل کو ہر قیمت پر برقرار رکھا جائے گا۔

پاسدارانِ انقلاب کے ترجمان نے مزید واضح کیا کہ ایرانی ایرو اسپیس فورس کے استعمال میں آنے والے تمام عسکری ہتھیار اور پروڈکشن ٹیکنالوجی مکمل طور پر مقامی دانش، سائنسی علم اور تکنیکی صلاحیتوں پر مبنی ہیں اور اس مقصد کے لیے ایران نے کسی بھی غیر ملکی قوت یا ملک پر انحصار نہیں کیا۔