روس نے ایک دن میں یوکرین کے 903 ڈرونز اور 4 نیپچون میزائل مار گرائے، وزارت دفاع

روس کی وزارت دفاع نے دعویٰ کیا ہے کہ اس کے فضائی دفاعی نظام (Air Defence System) نے گزشتہ 24 گھنٹوں کے دوران یوکرین کے 903 فکسڈ ونگ ڈرونز، 4 طویل فاصلے تک مار کرنے والے نیپچون گائیڈڈ میزائل اور 2 گائیڈڈ فضائی بموں کو فضا میں ہی تباہ کر دیا ہے۔

روسی حکام کی جانب سے جاری کردہ باضابطہ بیان کے مطابق، یوکرین کے خلاف جاری عسکری کارروائیوں کے دوران مختلف محاذوں پر یوکرینی فورسز کو شدید جانی و مالی نقصان پہنچایا گیا ہے۔ روسی فوج نے دعویٰ کیا ہے کہ گزشتہ 24 گھنٹوں میں مختلف محاذوں پر مجموعی طور پر 1,155 یوکرینی فوجی اور غیر ملکی جنگجو ہلاک یا زخمی ہوئے ہیں۔ اس کے علاوہ یوکرین کے ایک ریڈار اسٹیشن، زمینی روبوٹک نظام اور ڈرون سازی کی اہم تنصیبات سمیت گولہ بارود کے ذخائر کو بھی نشانہ بنایا گیا۔

وزارت دفاع کے جاری کردہ مجموعی اعداد و شمار کے مطابق، جنگ کے آغاز سے اب تک یوکرین کے 674 طیارے، 284 ہیلی کاپٹر، 2 لاکھ 81 ہزار سے زائد ڈرونز اور 31 ہزار سے زائد ٹینک اور بکتر بند گاڑیاں تباہ کی جا چکی ہیں۔ تاہم عالمی خبر رساں اداروں کا کہنا ہے کہ ان دعووں کی آزادانہ طور پر تصدیق ممکن نہیں ہو سکی ہے۔