صنعتوں کی سالانہ انسپکشن کا فیصلہ مسترد، ‘فباٹی’ کا الیکٹرک انسپکٹریٹ سے استثنیٰ دینے کا مطالبہ

فیڈرل بی ایریا ایسوسی ایشن آف ٹریڈ اینڈ انڈسٹری (FBATI) نے الیکٹرک انسپکٹریٹ کی جانب سے صنعتی یونٹس کی سالانہ انسپکشن کرنے کے فیصلے کو مکمل طور پر مسترد کرتے ہوئے حکومتِ سندھ سے اس فیصلہ کو فوری واپس لینے کا مطالبہ کیا ہے۔

صدر فباٹی سید رضا حسین نے اپنے ایک جاری بیان میں کہا کہ صنعتی شعبے کی سالانہ انسپکشن کا فیصلہ بلاجواز اور کاروباری سرگرمیوں میں براہ راست مداخِلَت کے مترادف ہے۔ انہوں نے زور دیا کہ صنعتی شعبے کو الیکٹرک انسپکٹریٹ کے اس دائرہ کار سے یکسر مستثنیٰ قرار دیا جائے، جبکہ بجلی کی تنصیبات کی انسپکشن کی حد صرف کمرشل عمارتوں تک ہی محدود رکھی جائے۔

سید رضا حسین نے مزید کہا کہ ملک کا صنعتی شعبہ پہلے ہی انتہائی مہنگی بجلی، گیس کی عدم فراہمی اور بھاری ٹیکسوں کے بوجھ تلے دبا ہوا ہے، ایسے میں سرکاری سطح پر مزید انتظامی مداخلت کسی صورت قابل قبول نہیں۔ صنعتی یونٹس کی بار بار انسپکشنز سے نہ صرف ہراسانی پھیلے گی بلکہ پیداواری عمل بھی شدید متاثر ہوگا۔ فباٹی کے صدر نے حکومت سے مطالبہ کیا کہ انڈسٹری کو غیر ضروری ضابطوں اور افسر شاہی کی رکاوٹوں سے نجات دلانے کے لیے 2003 کا استثنیٰ والا نوٹیفکیشن بلا تاخیر بحال کیا جائے۔