پنجاب جیسی شفاف حکومت کہیں اور نہیں دیکھی: گورنر سندھ

گورنر سندھ سید نہال ہاشمی نے کہا ہے کہ انہوں نے پنجاب جیسی شفاف اور فعال حکومت کہیں نہیں دیکھی، قانون کی بالادستی پر گفتگو کرتے ہوئے ان کا کہنا تھا کہ اگر قانون اچھا ہو تو اسے کوئی کالا نہیں کہتا، جبکہ سوشل میڈیا کی بے راہ روی نے معاملات کو خراب کیا ہے جس کی حرکتوں کے باعث لوگ گرفت میں آجاتے ہیں۔

لاہور پریس کلب میں صحافیوں اور میڈیا نمائندگان سے گفتگو کرتے ہوئے گورنر سندھ سید نہال ہاشمی نے صحافتی برادری کی خدمات کو سراہا۔ انہوں نے کہا کہ لاہور پریس کلب نے ہمیشہ ایک مثالی کردار ادا کیا ہے، صحافی ہر دور میں حق اور سچ کی پاسداری کرتے ہیں اور آزاد ابلاغ ہی ایک صحتمند معاشرے کی ضامن ہوتا ہے۔ ان کا کہنا تھا کہ جب بھی آمریت کا دور آیا ترقی کا راستہ رکا، لیکن میاں محمد نواز شریف نے آئین کی حکمرانی اور موٹرویز سمیت ملک بھر میں ترقی کے ایک نئے دور کی بنیاد رکھی جس سے کراچی کے عوام بھی بے حد متاثر ہیں۔

گورنر سندھ نے مزید کہا کہ ملک میں سب سے پہلی اور خطرناک کرپشن ذہنی کرپشن اور تعصب کی عینک ہے جس میں حقدار کو اس کا حق نہیں دیا جاتا۔ انہوں نے کراچی کے مسائل کا ذکر کرتے ہوئے کہا کہ کراچی سب سے زیادہ ٹیکس دیتا ہے مگر اسے اس کا جائز حق نہیں ملا، ماضی میں اداروں میں گھوسٹ ملازمین بھرتی کر کے شہریوں کے ساتھ زیادتی کی گئی۔ ان کا کہنا تھا کہ اداروں کی ذمہ داری ہے کہ وہ بلا تفریق کرپشن کو پکڑیں، اور کسی بھی انسانی حقوق کے منافی قانون کی حمائت نہیں کی جائے گی۔