سعودی وزیر خارجہ کے قطر اور مصر کے ہم منصبوں سے رابطے، علاقائی صورتحال پر تبادلہ خیال

سعودی عرب کے وزیر خارجہ شہزادہ فیصل بن فرحان نے قطر اور مصر کے اپنے ہم منصبوں سے الگ الگ ٹیلی فونک رابطے کیے ہیں، جن میں خطے کی مجموعی صورتحال اور بڑھتی ہوئی عسکری و سفارتی کشیدگی میں کمی لانے پر تفصیلی گفتگو کی گئی۔

سعودی وزارتِ خارجہ کی جانب سے جاری باضابطہ بیان کے مطابق، شہزادہ فیصل بن فرحان نے قطر کے وزیراعظم و وزیر خارجہ شیخ محمد بن عبدالرحمان آل ثانی سے رابطہ کر کے علاقائی پیش رفت کا تفصیلی جائزہ لیا۔ اس موقع پر دونوں رہنماؤں نے خطے میں تصادم کے خطرات کو کم کرنے کے لیے مشترکہ اور مربوط سفارتی کوششوں کی اہمیت پر زور دیا۔

علاوہ ازیں، سعودی وزیر خارجہ نے مصر کے وزیر خارجہ بدر عبدالعاطی سے بھی ٹیلی فون پر بات چیت کی۔ گفتگو کے دوران دونوں وزرائے خارجہ نے مشرقِ وسطیٰ میں امن و استحکام کی بحالی، خطے کے اہم معاملات پر باہمی مشاورت اور سفارتی تعاون کی فضا کو مزید مضبوط بنانے کے عزم کا اعادہ کیا۔