نئے سال 2026 کا پہلا سپر مون آج نظر آئے گا

نئے سال 2026 کا پہلا سپر مون آج آسمان پر دیکھا جا سکے گا۔ سپارکو کے ترجمان کے مطابق اس سپر مون کو روایتی طور پر وولف مون کہا جاتا ہے، جبکہ اس سے قبل جاری سپر مونز کا آخری مظاہرہ اکتوبر 2025 میں دیکھا گیا تھا۔

سپارکو ترجمان کا کہنا ہے کہ اس بار سپر مون کے ساتھ کواڈرینٹڈ شہابی بارش بھی اپنے عروج پر ہوگی، جو آسمان کے نظارے کو مزید دلکش بنا دے گی۔

ترجمان کے مطابق پاکستان میں سپر مون شام 5 بج کر 51 منٹ پر طلوع ہوگا، جبکہ چاند کی روشنی 99.8 فیصد تک ہوگی۔ یہ فلکیاتی منظر 3 اور 4 جنوری کو واضح طور پر دیکھا جا سکے گا۔

سپارکو کے مطابق زمین اور چاند کے درمیان فاصلہ تقریباً 3 لاکھ 62 ہزار کلومیٹر ہوگا، جس کے باعث چاند عام دنوں کے مقابلے میں 6 سے 7 فیصد بڑا اور تقریباً 10 فیصد زیادہ روشن دکھائی دے گا۔

سپارکو نے مزید بتایا کہ اگلا سپر مون رواں سال کے آخر میں نومبر 2026 میں دوبارہ نظر آئے گا۔