زمین کی گہرائیوں میں پانی کے وسیع ذخائر موجود ہونے کا انکشاف

چینی سائنس دانوں کی ایک تازہ تحقیق میں معلوم ہوا ہے کہ زمین کے وجود میں آنے کے ابتدائی عرصے میں سیارے کی گہرائی میں موجود مینٹل میں پانی کے وسیع ذخائر موجود تھے۔

جرنل سائنس میں شائع ہونے والی تحقیق کے مطابق چار ارب سال سے زیادہ قبل نچلے مینٹل میں پانی کے یہ ذخائر موجود تھے۔ گوانگژو انسٹیٹیوٹ آف جیو کیمسٹری، چائینیز اکیڈمی آف سائنسز کے سائنس دانوں نے جدید لیبارٹری تکنیک استعمال کرتے ہوئے تحقیق کی کہ زمین کے ٹھنڈا ہونے اور پگھلے ہوئے میگما کے ٹھوس میں بدلنے کے بعد پانی کا رویہ کیسا رہا۔

تحقیق میں برجمینائٹ معدنیات پر خاص توجہ دی گئی، جو زمین کے نچلے مینٹل میں وافر مقدار میں موجود ہے اور اس نے ابتدائی زمین کے پانی کے ذخائر کی موجودگی کی اہم نشاندہی کی۔ یہ دریافت زمین کی ارتقائی تاریخ اور سیارے پر پانی کے ارتقاء کے بارے میں نئے نظریات کو فروغ دے سکتی ہے۔