ٹیلی کام بل سے کسی کی ذاتی زمین اور جائیداد پر زبردستی قبضہ نہیں ہوگا: شزا فاطمہ

وفاقی وزیر برائے انفارمیشن ٹیکنالوجی و ٹیلی کام شزا فاطمہ نے واضح کیا ہے کہ نئے ٹیلی کام بل کے تحت کسی بھی شہری کی ذاتی زمین یا جائیداد پر زبردستی قبضہ نہیں کیا جائے گا، بلکہ نجی پراپرٹیز کے حوالے سے باقاعدہ کیٹگریز طے کی جائیں گی۔

وفاقی وزیر قانون اعظم نذیر تارڑ کے ہمراہ ایک اہم پریس کانفرنس کرتے ہوئے وفاقی وزیر شزا فاطمہ کا کہنا تھا کہ ٹیلی کام بل پر مالی بے ضابطگیوں اور دیگر نوعیت کے لگائے گئے تمام الزامات بالکل بے بنیاد ہیں۔ انہوں نے بتایا کہ انہوں نے خود وزیراعظم سے درخواست کی ہے کہ بل کے حوالے سے لگائے گئے الزامات کی اعلیٰ سطحی انکوائری کرائی جائے۔ انہوں نے مزید کہا کہ اس نئے بل کا بنیادی مقصد ملک بھر میں تیز رفتار انٹرنیٹ کی فراہمی ہے اور اس سلسلے میں تمام شراکت داروں کے ساتھ اتفاقِ رائے سے قانون سازی کی جا رہی ہے۔

اس موقع پر وفاقی وزیر قانون اعظم نذیر تارڑ نے تفصیلات بتاتے ہوئے کہا کہ کسی بھی نجی پراپرٹی سے انٹرنیٹ فائبر بچھانے کے لیے جائیداد کے مالک کی باقاعدہ اجازت حاصل کرنا لازمی ہوگا، اور ٹیلی کمیونیکیشن ایکٹ کا یہ بل 6 اہم ترامیم کے ساتھ منظور کیا گیا ہے۔ وزیر قانون نے واضح کیا کہ کمیٹی کو دور صدارت میں کسی بھی ایک مخصوص کمپنی کو نوازنے کے کوئی شواہد نہیں ملے، تاہم کمیٹی نے بل میں موجود تمام تکنیکی و قانونی سقم دور کرنے کی سخت ہدایت کی ہے۔