21 سابق کرکٹ کپتانوں کا وزیراعظم کو خط، عمران خان کیلئے طبی سہولیات کا مطالبہ

دنیا بھر کے 21 سابق ٹیسٹ و بین الاقوامی کپتانوں نے وزیراعظم شہباز شریف کو ایک خط ارسال کرتے ہوئے سابق پاکستانی کپتان اور بانی پی ٹی آئی عمران خان کے آزادانہ طبی معائنے اور علاج کا مطالبہ کیا ہے۔ کرکٹ ویب سائٹ ‘کرک انفو’ کے مطابق سابق کپتانوں نے خط میں سپریم کورٹ کی ہدایات کے مطابق عمران خان، بالخصوص ان کی دائیں آنکھ کی بینائی کی صورتحال کے لیے ایک آزاد میڈیکل بورڈ کے قیام اور ہفتہ وار خاندانی ملاقاتوں کی بحالی کا مطالبہ کیا۔ خط پر مائیکل ایتھرٹن، ایلن بارڈر، سنیل گواسکر، ایڈم گلکرسٹ اور کپل دیو سمیت نامور کرکٹرز کے دستخط موجود ہیں، جنہوں نے واضح کیا کہ ان کا مقصد داخلی امور میں مداخلت نہیں بلکہ اپنے سابق حریف و ساتھی کی صحت پر تشویش کا اظہار ہے۔ دوسری جانب وفاقی وزیر اطلاعات عطا تارڑ نے کہا ہے کہ حکومت نے سپریم کورٹ کے احکامات پر مکمل اور شفاف طریقے سے عملدرآمد کرتے ہوئے تمام قانونی اور طبی تقاضے پورے کیے ہیں۔