محمود اچکزئی دہشت گردوں کا نام نہ لے کر غلط بیانی کر رہے ہیں: وزیر داخلہ بلوچستان

وزیرِ داخلہ بلوچستان میر ضیاء اللہ لانگو نے قومی اسمبلی میں اپوزیشن لیڈر محمود خان اچکزئی کے بیان پر شدید ردِعمل دیتے ہوئے کہا ہے کہ وہ اپنی جان کے خوف کی وجہ سے دہشت گردوں کا نام نہ لے کر کھلی غلط بیانی کر رہے ہیں۔ انہوں نے کہا کہ سرانان حملے کی ذمہ داری کالعدم تنظیم قبول کر چکی ہے، مگر اپوزیشن لیڈر ڈر اور خوف کی وجہ سے دہشت گرد گروہوں کو نامزد کرنے سے گریزاں ہیں، جو کہ دوغلے پن کے مترادف ہے۔ صوبائی وزیرِ داخلہ کا مزید کہنا تھا کہ بعض سیاست دان شارٹ کٹ اپناتے ہوئے سارا ملبہ حکومت پر ڈال دیتے ہیں اور عوام سے اصل حقائق چھپاتے ہیں۔ انہوں نے واضح کیا کہ پشتونوں کو سچائی بتانے کے بجائے غلط راستے پر ڈالنا پشتون دوستی نہیں بلکہ ان سے کھلی دشمنی ہے۔