آئی ایس پی آر سمر انٹرن شپ پروگرام؛ پروفیسر ڈاکٹر ہما بقائی کی طلبہ کیساتھ نشست

آئی ایس پی آر سمر انٹرن شپ پروگرام کے تحت منعقدہ ایک خصوصی نشست میں ریکٹر ملینیم انسٹی ٹیوٹ آف ٹیکنالوجی اینڈ انٹرپرینیورشپ، پروفیسر ڈاکٹر ہما بقائی نے ملک بھر کے 21 مختلف اسٹیشنز سے شریک 6 ہزار 150 سے زائد طلبہ و طالبات سے خطاب کیا۔ اپنے خطاب کے دوران انہوں نے قومی سلامتی، علاقائی صورتحال، معاشی استحکام، اور خطے میں بھارت و افغانستان کے کردار پر تفصیلی گفتگو کی۔ ان کا کہنا تھا کہ پاکستان اپنی قومی سلامتی کے ساتھ ساتھ علاقائی امن و استحکام کے لیے بھی مسلسل کوشاں ہے، جبکہ بھارت، افغانستان کے ذریعے پاکستان میں مشکلات اور دہشت گردی پھیلانے کی کوششیں کر رہا ہے۔ ڈاکٹر ہما بقائی نے مئی 2025 کے ‘معرکۂ حق’ کی کامیابی کا ذکر کرتے ہوئے کہا کہ اس دوران پاکستان نے نہ صرف سرحدی و فضائی محاذ پر فتح حاصل کی بلکہ بھارت کے “نیٹ سیکیورٹی پرووائیڈر” ہونے کے بیانیے کو بھی زمین بوس کر دیا۔ انہوں نے زور دیا کہ بدلتے عالمی حالات میں قومی مفادات اور معاشی و عسکری استحکام کا تحفظ بے حد ضروری ہے۔