ٹی ٹوئنٹی ورلڈ کپ: بنگلہ دیش ٹیم کے بھارت نہ جانے پر پی سی بی کی میزبانی کی پیشکش

آئی سی سی ٹی ٹوئنٹی ورلڈ کپ میں بنگلہ دیش کرکٹ ٹیم کے بھارت نہ جانے کے فیصلے پر پاکستان کرکٹ بورڈ (پی سی بی) نے نئی تجویز دے دی ہے۔ ذرائع کے مطابق پاکستان نے بنگلہ دیش کے ورلڈ کپ میچز کی میزبانی میں باضابطہ دلچسپی ظاہر کر دی ہے۔

ذرائع کا کہنا ہے کہ وقت کی کمی کے باعث اگر سری لنکا کے وینیوز بروقت تیار نہ ہو سکے تو پاکستان کے وینیوز مکمل طور پر میچز کی میزبانی کے لیے تیار ہیں۔ پاکستان کے تمام بڑے کرکٹ اسٹیڈیمز عالمی معیار کے مطابق تیار حالت میں موجود ہیں۔

ذرائع کے مطابق بنگلہ دیش کرکٹ بورڈ نے بھارت میں ٹیم کی سکیورٹی صورتحال پر تحفظات کا اظہار کرتے ہوئے ورلڈ کپ میچز کے لیے بھارت نہ جانے کا فیصلہ کیا ہے۔ذرائع نے بتایا کہ اگر سری لنکا بنگلہ دیش کے میچز کی میزبانی کرنے سے قاصر رہا تو پاکستان فوری طور پر متبادل میزبان کے طور پر تیار ہے۔آئی سی سی بنگلہ دیش کے میچز کی منتقلی یا موجودہ شیڈول برقرار رکھنے کے حوالے سے حتمی فیصلہ جلد کرے گی۔