سڈنی سوینی کے بولڈ اسپورٹس اشتہار پر کھلاڑیوں کا اعتراض، خواتین کی نمائندگی پر نئی بحث

ہالی ووڈ اداکارہ سڈنی سوینی کی امریکی اسپورٹس پریڈکشن پلیٹ فارم ‘نووگ’ (Novig) کے لیے بنائی گئی نئی تشہیری مہم نے خواتین کے کھیلوں اور ان کی نمائندگی کے انداز پر ایک نئی عالمی بحث چھیڑ دی ہے۔ اس مہم کی تصاویر میں سڈنی سوینی کو باسکٹ بال اور فٹ بال جیسے کھیلوں کے سامان کے ساتھ بولڈ اور جلی انداز میں پوز کرتے دکھایا گیا ہے، جس پر عام صارفین کے ساتھ ساتھ عالمی شہرت یافتہ پیشہ ور خواتین کھلاڑیوں نے بھی شدید تحفظات اور ناراضی کا اظہار کیا ہے۔

چار مرتبہ کی اولمپک گولڈ میڈلسٹ سوئمر آرین ٹٹمس اور برطانوی اسپرنٹر ایمی ہنٹ سمیت متعدد نامور ایتھلیٹس نے مہم پر تنقید کرتے ہوئے کہا کہ کھیلوں میں خواتین کی برسوں کی سخت محنت، تربیت اور کامیابیوں کو سراہنے کے بجائے ان کے جسم کو تشہیری حربے کے طور پر استعمال کرنا نامناسب ہے۔ اولمپک میڈلسٹ ٹلی کیئرنز اور باکسر اسکائی نکلسن کا کہنا تھا کہ اصل مسئلہ اداکارہ کا انداز نہیں بلکہ کھیلوں کی تشہیر میں واقعی کھیل اور محنت کے بجائے جنسی کشش کو ابھارنا ہے۔ دوسری جانب نووگ نے سڈنی سوینی کا دفاع کرتے ہوئے انہیں کمپنی کا اسٹریٹجک پارٹنر اور شیئر ہولڈر قرار دیا ہے۔