سوئٹزرلینڈ: گلیشیئرز کو تیزی سے پگھلنے سے روکنے کیلئے منفرد تجربہ شروع

زیورخ: سوئٹزرلینڈ میں ماحولیاتی ماہرین نے گلیشیئرز کی شدید برف پگھلنے کی رفتار کو سست کرنے کے لیے مصنوعی پلاسٹک چادروں کے بجائے بھیڑ کی اون سے تیار کردہ قدرتی کمبلوں کے استعمال کا ایک منفرد اور کامیاب تجربہ کیا ہے۔

ماحولیاتی تنظیم ’سمِٹ فاؤنڈیشن‘ اور یونیورسٹی آف لوزان کے زیرِ اہتمام ’کِیپ اِٹ کوُل‘ (Keep It Cool) منصوبے کے تحت مغربی سوئٹزرلینڈ کے سان فلورون گلیشیئر پر اون سے بنے خصوصی کمبل بچھائے گئے۔ 200 مربع میٹر رقبے پر کیے گئے اس تجربے کی نگرانی کرنے والے محققین کے مطابق ہر دو ہفتے بعد کی جانے والی پیمائش سے ثابت ہوا ہے کہ قدرتی اون کے کمبل مصنوعی جیو ٹیکسٹائل چادروں کی طرح ہی گلیشیئر کی برف کو پگھلنے سے روکنے میں انتہائی مؤثر اور پائیدار ثابت ہوئے ہیں۔

اس منصوبے کا دوسرا اہم مقصد سوئٹزرلینڈ میں ضائع ہونے والی بھیڑ کی اون کا مثبت استعمال ممکن بنانا ہے۔ سوئٹزرلینڈ میں سالانہ پیدا ہونے والی اون کا 40 سے 70 فیصد حصہ ضائع کر دیا جاتا ہے۔ تاہم، محققین کا کہنا ہے کہ اگرچہ اون کا استعمال ایک بہترین مقامی اور ماحول دوست اقدام ہے، لیکن یہ موسمیاتی تبدیلی کا مستقل حل نہیں۔ ماہرین کے مطابق گلیشیئرز کے طویل مدتی بقا کے لیے عالمی سطح پر گرین ہاؤس گیسوں اور فوسل فیولز کے اخراج میں ڈرامائی کمی کرنا ہی واحد حل ہے۔