وکلا ہڑتال بارے سپریم کورٹ نے اہم فیصلہ جاری کر دیا

سپریم کورٹ نے وکلا کی ہڑتال، نظرثانی (Review) کے دائرۂ اختیار اور مقدمات میں غیر ضروری التوا سے متعلق ایک اہم اور تاریخی فیصلہ جاری کرتے ہوئے 12 کنال اراضی سے متعلق کیس میں درخواست گزار شکیل احمد کی اپیل منظور کر لی ہے۔

جسٹس شکیل احمد کی جانب سے تحریر کردہ فیصلے میں سپریم کورٹ نے لاہور ہائیکورٹ اور ٹرائل کورٹ کے فیصلے کالعدم قرار دیتے ہوئے عبدالغفار کے خلاف اراضی کے مقدمے کو دوبارہ ٹرائل کورٹ کو بھجوا دیا اور ہدایت کی کہ اس کیس کا حتمی فیصلہ چھ ماہ کے اندر کیا جائے۔ عدالتِ عظمیٰ نے قرار دیا کہ وکلا کی ہڑتال کے باعث عدالت میں عدم پیشی کو مدعی کی غفلت نہیں کہا جا سکتا، اور قانونی شرائط پوری کیے بغیر شواہد پیش کرنے کا حق ختم کرنا غیر قانونی اقدام تھا۔

سپریم کورٹ نے اپنے فیصلے میں واضح کیا کہ اگر فیصلے میں واضح قانونی غلطی موجود ہو تو نظرثانی کی درخواست مکمل قابلِ سماعت ہوتی ہے، اور اپیل کا حق موجود ہونے سے نظرثانی کا دائرۂ اختیار ختم نہیں ہوتا۔ عدالت نے کہا کہ ٹرائل کورٹ نے نظرثانی کی درخواست مسترد کر کے قانون کا غلط استعمال کیا اور انصاف کی راہ میں تکنیکی رکاوٹیں کھڑی کیں۔

عدالتِ عظمیٰ نے نظامِ عدل میں تاخیر پر شدید تشویش کا اظہار کرتے ہوئے کہا کہ غیر ضروری التوا اور “تاریخ پر تاریخ” دینے کی روایت انصاف کے نظام کو تباہ کر رہی ہے۔ سپریم کورٹ نے قرار دیا کہ عدالتی احکامات کو مذاق نہیں بننے دیا جا سکتا اور وکلا کو صرف اتنے ہی مقدمات قبول کرنے چاہئیں جتنے وہ دیانت داری سے چلا سکیں۔ عدالت نے زور دیا کہ دوسری عدالت میں مصروفیت ہر بار کیس ملتوی کرانے کی معقول وجہ نہیں ہو سکتی۔