پاکستان کے ساتھ تجارت اور سرمایہ کاری بڑھانے کے وسیع مواقع ہیں: ہسپانوی سفیر

سپین کے سفیر کارلوس آراگون گل ڈی لا سرنا نے راولپنڈی چیمبر آف کامرس اینڈ انڈسٹری (RCCI) کے دورے کے موقع پر تاجر برادری سے ملاقات کے دوران کہا ہے کہ پاکستان اور سپین کے مابین تجارت، سرمایہ کاری، اقتصادی تعاون اور ثقافتی تعلقات کو مزید مضبوط بنانے کے وسیع امکانات موجود ہیں۔ اس موقع پر پاک سپین حالیہ مشاورت کے تناظر میں زراعت کے شعبے میں مشترکہ ورکنگ گروپ قائم کرنے پر غور کیا گیا، جو زرعی شعبے میں باہمی تعاون کو منظم بنانے میں اہم کردار ادا کرے گا۔ پاکستان نے ٹیکسٹائل کے ساتھ ساتھ سپین کی مارکیٹ میں چاول، ایتھنول، آلو اور مکئی کی برآمدات بڑھانے کے لیے کوششیں تیز کرنے کا عزم ظاہر کیا۔

تقریب کے دوران وزیراعظم یوتھ پروگرام کے چیئرمین رانا مشہود احمد خان اور آر سی سی آئی کے صدر عثمان شوکت نے سپین کے سفیر کو فیفا ورلڈ کپ کے لیے پاکستان میں تیار کردہ اعلیٰ معیار کا فٹ بال تحفے میں پیش کیا، جس سے کھیلوں کا سامان بنانے کی ملکی صلاحیت اور پاکستان کے عالمی تشخص کو اجاگر کیا گیا۔ سفیرِ سپین نے آر سی سی آئی کی یومِ آزادی کی تقریب اور کیک کاٹنے کے پروگرام میں بھی شرکت کی جو دونوں ممالک کے دوستانہ سفارتی اور عوامی تعلقات کی بہترین عکاسی کرتا ہے۔

آر سی سی آئی کے صدر نے زور دیا کہ پاکستان جدید زراعت، پریسیژن فارمنگ، جدید آبپاشی نظام، گرین ہاؤس ٹیکنالوجی اور واٹر مینجمنٹ میں سپین کی مہارت سے بھرپور فائدہ اٹھا سکتا ہے، جس کے لیے نجی شعبے اور بزنس ٹو بزنس (B2B) روابط کو مزید متحرک کرنے کی ضرورت ہے۔