خاران میں سکیورٹی فورسز کا کامیاب انٹیلی جنس بیسڈ آپریشن، 7 دہشت گرد جہنم واصل

بلوچستان میں ‘آپریشن ردالفتنہ 3’ کے تحت سکیورٹی فورسز نے خاران کے علاقے لجے میں دہشت گردوں کی موجودگی کی خفیہ اطلاع پر ایک کامیاب انٹیلی جنس بیسڈ آپریشن کیا ہے، جس کے نتیجے میں 7 دہشت گرد ہلاک جبکہ متعدد زخمی ہو گئے۔ سکیورٹی ذرائع کے مطابق فورسز کی جانب سے کی گئی اس مؤثر کارروائی کے دوران دہشت گردوں کے گڑھ اور ٹھکانوں کو مکمل طور پر تباہ کر دیا گیا۔ سرچ آپریشن کے دوران ہلاک و زخمی ہونے والے عناصر کے قبضہ سے جدید اسلحہ، بھاری مقدار میں گولہ بارود، جنگی سامان، 2 گاڑیاں اور ایک موٹر سائیکل بھی برآمد کی گئی ہے۔

سکیورٹی ذرائع کا کہنا ہے کہ یہ عناصر خاران اور لجے کے اطراف میں لوٹ مار، بھتہ خوری، اغواء برائے تاوان، ٹارگٹ کلنگ اور خودکش حملوں کی منصوبہ بندی سمیت سنگین وارداتوں میں ملوث تھے۔ ذرائع نے اس عزم کا اعادہ کیا ہے کہ بلوچستان میں آپریشن ردالفتنہ 3 کے تحت دہشت گردی کے مکمل خاتمے کے لیے کارروائیاں بلا تعطل جاری رہیں گی، اور آخری عنصر کے خاتمے تک تمام ضروری اقدامات کو یقینی بنایا جائے گا۔