وزیراعلیٰ مریم نواز سے اٹک کے ارکان اسمبلی کی ملاقات، ترقیاتی منصوبوں پر تبادلہ خیال

وزیراعلیٰ پنجاب مریم نواز شریف سے ضلع اٹک سے تعلق رکھنے والے ارکانِ صوبائی اسمبلی نے ایک اہم ملاقات کی، جس میں ضلع اٹک کی عوامی ضروریات، جاری ترقیاتی پروگرامز اور مستقبل کے منصوبوں پر تفصیلی تبادلہ خیال کیا گیا۔ اس موقع پر ارکانِ اسمبلی نے آزاد جموں و کشمیر کے انتخابات میں مسلم لیگ (ن) کی کامیابی پر وزیراعلیٰ کو مبارکباد پیش کی اور اٹک میں الیکٹروبس سروس کے کامیاب آغاز پر انہیں زبردست خراجِ تحسین پیش کیا۔

ارکانِ اسمبلی نے بتایا کہ ‘پی او ایف سنجوال تا حضرو’ اور ‘گورنمنٹ کالج آف ٹیکنالوجی ڈھوک فتح تا اٹک خورد’ روٹس پر الیکٹروبس سروس کامیابی سے روان دواں ہے، جس پر عوام بالخصوص خواتین، طلبہ اور بزرگ شہریوں کی جانب سے انتہائی مثبت ردعمل سامنے آیا ہے۔ انہوں نے مفت سفری سہولت اور ‘مثالی گاؤں پراجیکٹ’ کے تحت دیہی علاقوں کی اپ گریڈیشن کو انقلابی اقدامات قرار دیتے ہوئے کہا کہ پنجاب کا ترقیاتی ماڈل دیگر صوبوں کے لیے ایک مثال بن چکا ہے۔

ملاقات کے دوران وزیراعلیٰ مریم نواز شریف نے اہم اعلانات کرتے ہوئے کہا:

• پینے کے صاف پانی کا نیا منصوبہ: ‘ستھرا پنجاب’ پروگرام کی تاریخی کامیابی کے بعد اب پورے پنجاب کے تمام شہروں میں پینے کا صاف پانی مہیا کرنے کا جامع منصوبہ حکومت کی اولین ترجیحات میں شامل کر لیا گیا ہے۔

• پنجاب ڈویلپمنٹ پروگرام: صوبے بھر میں سیوریج سسٹم، نکاسیِ آب اور سڑکوں کی تعمیر و مرمت کے میگا پراجیکٹس پر تیزی سے کام جاری ہے۔

• کارکردگی کی روایت: مسلم لیگ (ن) کا ماضی بھی موٹرویز اور ایٹمی قوت جیسے تاریخی کارناموں سے عبارت ہے، اور موجودہ حکومت بھی اسی عزم کے ساتھ عوامی خدمت میں مصروفِ عمل ہے۔