سپارکو نے ’سپیس فار کلائمیٹ‘ اقدام کا آغاز کر دیا: آئی ایس پی آر

راولپنڈی/اسلام آباد: پاکستان کے خلائی ادارے ‘سپارکو’ نے موسمیاتی تبدیلی کے بڑھتے ہوئے خطرات سے نمٹنے کے لیے ایک انقلابی قدم اٹھاتے ہوئے ’’اسپیس فار کلائمیٹ‘‘ (Space for Climate) انیشیٹو کا باقاعدہ آغاز کر دیا ہے۔ پاک فوج کے شعبہ تعلقات عامہ (آئی ایس پی آر) کے مطابق، اس اقدام کے تحت پاکستان کی پہلی جیواے آئی (Geo-AI) کلائمیٹ آبزرویٹری قائم کر دی گئی ہے، جو مصنوعی ذہانت اور خلائی ٹیکنالوجی کے امتزاج سے کام کرے گی۔

اس جدید آبزرویٹری کے ذریعے پاکستان میں فضائی آلودگی، گرین ہاؤس گیسوں کے اخراج، جنگلات کی کٹائی اور گلیشیئرز کے پگھلنے کی مسلسل اور باریک بینی سے مانیٹرنگ کی جائے گی۔ آئی ایس پی آر کا کہنا ہے کہ یہ نظام سیلاب، خشک سالی، ہیٹ ویوز اور سمندری سطح میں اضافے جیسے قدرتی خطرات پر نظر رکھنے میں کلیدی کردار ادا کرے گا۔

خلائی اور زمینی ڈیٹا کے اس اشتراک سے حاصل ہونے والی معلومات پالیسی سازوں کو بروقت فراہم کی جائیں گی، تاکہ موسمیاتی آفات سے بچاؤ کے لیے مؤثر حکمتِ عملی تیار کی جا سکے۔ یہ اقدام پاکستان کے موسمیاتی اہداف کو عالمی کوششوں کے مطابق آگے بڑھانے میں معاون ثابت ہوگا اور مستقبل میں قدرتی آفات کے نقصانات کو کم کرنے میں مدد دے گا۔