عامر خان اور سنیل گروور کی نئی ویڈیو وائرل

ممبئی: بھارت کے مقبول ترین کامیڈی شو ’دی گریٹ انڈین کپل شو‘ کے چوتھے ایڈیشن میں کامیڈین سنیل گروور کی عامر خان کی نقالی نے سب کی توجہ حاصل کرلی۔ شو میں اداکار کارتک آریان اور اداکارہ اننیا پانڈے اپنی فلم ’تو میری، میں تیرا، میں تیرا، تو میری‘ کی تشہیر کے لیے آئے تھے، تاہم سنیل گروور نے اپنی زبردست کامیڈی اور عامر خان کی نقالی سے سب کی نظریں اپنی طرف کر لیں۔

سوشل میڈیا پر سنیل گروور کی عامر خان کی نقل کے چرچے ہیں۔ اس سے قبل سنیل گروور نے معروف شخصیات جیسے گلزار، سلمان خان، شاہ رخ خان، اجے دیوگن، اکشے کمار اور کپل دیو کی بھی نقالی کی ہے۔

پیر کے روز ایک گالف فاؤنڈیشن ایونٹ کے دوران دی فری پریس جرنل سے گفتگو میں 60 سالہ عامر خان نے سنیل گروور کی نقالی پر ہنس کر تعریف کی اور محبت بھرے انداز میں ان کی قابلیت کو سراہا۔