آبنائے ہرمز پر سفارت کاری تیز، عمانی وفد تہران پہنچ گیا، قطر کا مذاکرات جاری رکھنے پر زور

خلیج میں بڑھتی ہوئی کشیدگی کے پیشِ نظر آبنائے ہرمز کے مستقبل اور بحری آمدورفت کے تحفظ کے لیے سفارتی سرگرمیوں میں تیزی آ گئی ہے۔ عمانی اعلیٰ سطحی وفد تہران پہنچ گیا ہے جہاں وہ ایرانی حکام سے ملاقاتوں کے دوران آبنائے ہرمز میں جہاز رانی کے مشترکہ انتظام پر تبادلہ خیال کرے گا۔ اگرچہ ایران عمان کے ساتھ مل کر اس بحری راستے کا انتظام سنبھالنے پر تیار ہے، تاہم امریکا اور خلیجی ممالک اس تجویز کو پہلے ہی مسترد کر چکے ہیں۔ دوسری جانب قطری وزیراعظم شیخ محمد بن عبدالرحمن آل ثانی نے برطانوی وزیر خارجہ ایڈ ملی بینڈ سے ملاقات میں امریکا اور ایران پر زور دیا ہے کہ وہ باہمی مفاہمتی یادداشت پر مکمل عملدرآمد کریں اور آبنائے ہرمز میں آزادانہ جہاز رانی کو یقینی بنائیں۔ قطری وزیراعظم نے واضح کیا کہ خطے میں پائیدار استحکام اور کشیدگی کے خاتمے کے لیے سفارتی مذاکرات اور جامع معاہدے ہی واحد حل ہیں۔