روس اور یوکرین کے درمیان حملوں میں شدت، فضائی کارروائیوں میں متعدد افراد ہلاک

روس اور یوکرین کے درمیان جاری جنگ میں ایک بار پھر شدید تپش دیکھی جا رہی ہے، جہاں دونوں ممالک نے ایک دوسرے پر تباہ کن فضائی اور میزائل حملے کیے ہیں۔ یوکرین کے صدر وولودیمیر زیلنسکی کے مطابق سلوویانسک شہر پر روسی فضائی حملے میں 6 افراد ہلاک جبکہ متعدد زخمی ہوئے، جبکہ کیف اور چرنیہیو میں میزائل و ڈرون حملوں سے بجلی کا نظام شدید متاثر ہوا ہے۔ دوسری جانب یوکرین نے بھی جوابی کارروائی کرتے ہوئے روس کے کیروف ریجن میں ایک فوجی کارخانے اور تیل کے ذخیرے کو نشانہ بنایا، جس میں مقامی گورنر کے مطابق 6 افراد ہلاک اور 26 زخمی ہوئے۔ اسی اثنا میں روسی وزارت دفاع نے دعویٰ کیا ہے کہ ان کی افواج نے خارکیف کے دو دیہات کا کنٹرول سنبھال لیا ہے اور گزشتہ ہفتے یوکرینی بحریہ کے 27 جہازوں کو بھی نشانہ بنایا ہے۔