سندھ کے علاقے حیدر آباد سے مبینہ افغان دہشت گرد گرفتار

کاؤنٹر ٹیررازم ڈیپارٹمنٹ (سی ٹی ڈی) نے سندھ کے ضلع حیدرآباد میں خفیہ اطلاع پر کارروائی کرتے ہوئے تھانہ ہٹڑی کی حدود سے ایک مبینہ افغان دہشت گرد کو گرفتار کر لیا ہے۔ سی ٹی ڈی ترجمان کے مطابق گرفتار ملزم کے کالعدم تحریک طالبان پاکستان (ٹی ٹی پی) سے مبینہ روابط ہیں اور اس کے قبضے سے ایک ہینڈ گرنیڈ برآمد ہوا ہے۔ ابتدائی تفتیش سے معلوم ہوا ہے کہ ملزم پاکستان میں غیر قانونی طور پر مقیم تھا اور تخریب کاری کی منصوبہ بندی کر رہا تھا۔ ملزم کے پاس سے کوئی قانونی سفری یا رہائشی دستاویزات نہ ملنے پر اس کے خلاف انسدادِ دہشت گردی اور غیر قانونی قیام کی دفعات کے تحت مقدمہ درج کر لیا گیا ہے۔ حکام کا کہنا ہے کہ ملزم سے اس کے سہولت کاروں اور ممکنہ نیٹ ورک کی تلاش کے لیے مزید تحقیقات جاری ہیں۔