پاکستان میں ڈیجیٹل بینکاری کا انقلاب: ریٹیل ٹرانزیکشنز میں 92 فیصد حصہ ڈیجیٹل چینلز کا، اسٹیٹ بینک کی رپورٹ جاری

کراچی: اسٹیٹ بینک آف پاکستان نے مالی سال 2026ء کی دوسری سہ ماہی کے لیے ادائیگیوں کے نظام کی تفصیلی جائزہ رپورٹ جاری کر دی ہے، جس کے مطابق ملک میں ڈیجیٹل ادائیگیوں کے رجحان میں غیر معمولی اضافہ ریکارڈ کیا گیا ہے۔ رپورٹ کے مطابق اس عرصے کے دوران کل 3.4 ارب ریٹیل ٹرانزیکشنز ہوئیں، جن میں سے 92 فیصد ادائیگیاں ڈیجیٹل ذرائع سے انجام دی گئیں۔

رپورٹ کے مطابق ریٹیل ٹرانزیکشنز کی تعداد میں سہ ماہی بنیادوں پر 8 فیصد جبکہ مالیت میں 7 فیصد اضافہ ہوا، جو 167 کھرب روپے تک پہنچ گئی۔ ڈیجیٹل ذرائع سے مجموعی طور پر 64 کھرب روپے مالیت کی 3.1 ارب ٹرانزیکشنز کی گئیں۔ بینکنگ ایپس کے ذریعے 40 کھرب روپے کی 2.6 ارب ٹرانزیکشنز ہوئیں، جبکہ انٹرنیٹ بینکاری میں ٹرانزیکشنز کی تعداد میں 11 فیصد اور مالیت میں 22 فیصد کا نمایاں اضافہ دیکھا گیا۔

اسٹیٹ بینک کے مطابق فوری ادائیگی کے نظام ’راست‘ نے اپنی مستحکم نمو برقرار رکھی ہے، جس کے ذریعے 18.5 کھرب روپے کی 64 کروڑ 57 لاکھ ٹرانزیکشنز کی گئیں۔ رپورٹ میں یہ بھی بتایا گیا کہ ملک میں زیرِ گردش پیمنٹ کارڈز کی تعداد 6 کروڑ 67 لاکھ تک پہنچ گئی ہے، جن میں 87 فیصد ڈیبٹ کارڈز اور محض 5 فیصد کریڈٹ کارڈز شامل ہیں۔ یہ اعداد و شمار ملک میں تیزی سے بڑھتی ہوئی ڈیجیٹل معیشت کی عکاسی کرتے ہیں۔