سہیل سمیر کے شارٹ فلم میں ادا کیے گئے بولڈ سینز وائرل، صارفین نے آڑے ہاتھوں لے لیا

کراچی: پاکستانی ڈراما انڈسٹری اور فلموں کے معروف ورسٹائل اداکار سہیل سمیر اپنی نئی شارٹ فلم ’دوسری عورت‘ کے ایک بولڈ اور بولڈ مناظر کے باعث سوشل میڈیا صارفین کی شدید تنقید کا نشانہ بن رہے ہیں۔

سسپنس اور تھرلر موضوع پر مبنی اس شارٹ فلم کے ایک وائرل کلپ میں سہیل سمیر کو اپنی ساتھی اداکارہ کے ساتھ گہرے رومانوی انداز میں دکھایا گیا ہے۔ ویڈیو منظرِ عام پر آنے کے بعد سوشل میڈیا صارفین نے نہ صرف اس منظر بلکہ ادا کیے گئے مکالموں کو بھی پاکستانی خاندانی اقدار کے منافی قرار دے کر سخت اعتراضات اٹھائے ہیں۔ متعدد صارفین نے اس شارٹ فلم کے مناظر کا موازنہ بھارتی اور ترکی ڈراموں سے کرتے ہوئے سوال اٹھایا کہ ایسے مناظر کو بغیر کسی سنسرشپ یا بندش کے نشر کرنے کی اجازت کیسے دی گئی۔

واضح رہے کہ سہیل سمیر کا شمار پاکستان کے منجھے ہوئے اداکاروں میں ہوتا ہے۔ انہوں نے ’سنو چندا‘، ’تیرے بن‘، ’عشق ہوا‘ اور ’دایان‘ جیسے مقبول ترین ڈراموں میں اپنی جاندار اداکاری سے ناظرین کے دل جیتے۔ تاہم اس بار بولڈ مواد کے انتخاب پر سوشل میڈیا صارفین ان سے شدید نالاں نظر آ رہے ہیں۔