سنیپ چیٹ نے لاکھوں صارفین کے اکاؤنٹس معطل کر دیے

سنیپ چیٹ نے آسٹریلیا میں نئے سوشل میڈیا قوانین کے تحت 16 سال سے کم عمر صارفین کے 4 لاکھ 15 ہزار سے زائد اکاؤنٹس معطل کر دیے ہیں۔

کمپنی کے مطابق آسٹریلیا میں نافذ کیے گئے قانون کے بعد کم عمر صارفین کے خلاف کارروائی کا عمل تیز کر دیا گیا ہے اور روزانہ کی بنیاد پر مزید اکاؤنٹس کی جانچ اور بلاکنگ کا سلسلہ جاری ہے۔ سنیپ چیٹ کا کہنا ہے کہ عمر کی تصدیق کرنے والی موجودہ ٹیکنالوجی مکمل طور پر مؤثر نہیں، جس کے باعث بعض کم عمر صارفین پابندی سے بچ نکلتے ہیں۔

نئے قانون کے تحت سنیپ چیٹ، میٹا، ٹک ٹاک، یوٹیوب اور دیگر سوشل میڈیا پلیٹ فارمز کو 16 سال سے کم عمر صارفین کے اکاؤنٹس بلاک کرنے کا پابند بنایا گیا ہے۔ قانون کی خلاف ورزی کی صورت میں آسٹریلوی حکومت کی جانب سے کمپنیوں پر 49.5 ملین آسٹریلوی ڈالر (تقریباً 34 ملین امریکی ڈالر) تک جرمانہ عائد کیا جا سکتا ہے۔

آسٹریلیا کے آن لائن سیفٹی ریگولیٹر کے مطابق اب تک ٹیکنالوجی کمپنیوں نے مجموعی طور پر 4.7 ملین کم عمر صارفین کے اکاؤنٹس بند کر دیے ہیں، جسے حکام نے ایک بڑی اور اہم کامیابی قرار دیا ہے۔

سنیپ چیٹ نے مطالبہ کیا ہے کہ ایپ اسٹورز پر صارفین کی عمر کی تصدیق کو لازمی قرار دیا جائے تاکہ کم عمر افراد کی سوشل میڈیا ایپس تک رسائی مؤثر طور پر روکی جا سکے۔