سندھ کاٹن جننگ فیکٹریوں میں کپاس کی ترسیل میں غیر معمولی اضافہ ریکارڈ

کاٹن ایئر 2025-26 میں پنجاب اور بلوچستان سے کپاس کی غیر معمولی خریداری کے باعث سندھ کی کاٹن جننگ انڈسٹری میں سرگرمیاں وقت سے قبل عروج پر پہنچ گئی ہیں، جس کے نتیجے میں صوبے بھر میں 82 جننگ فیکٹریاں فعال ہو گئی ہیں۔

چیئرمین کاٹن جنرز فورم احسان الحق نے بتایا کہ بدین، ٹھٹھہ، میرپورخاص، حیدرآباد، عمرکوٹ اور سانگھڑ سمیت سندھ کے بڑے کاٹن زونز میں کپاس کی دستیابی بڑھنے سے جننگ سیزن جون میں ہی شروع ہو گیا ہے۔

انہوں نے کہا کہ ماضی میں بھی پنجاب کے متعدد جنرز سندھ سے کپاس خرید کر اپنی فیکٹریاں چلاتے رہے ہیں، تاہم رواں سیزن میں یہ سرگرمیاں ملکی تاریخ میں پہلی بار بڑے پیمانے پر دیکھنے میں آئی ہیں۔