خیبر پختونخوا میں نظام مفلوج تھا، قانون کے دائرے میں عوام کیلئے اقدامات کریں گے: شزا فاطمہ

وفاقی وزیر برائے آئی ٹی و ٹیلی کام شزا فاطمہ خواجہ نے کہا ہے کہ خیبر پختونخوا میں حکومتی نظام مکمل طور پر مفلوج ہو چکا تھا، تاہم وفاقی حکومت آئین اور قانون کی حدود میں رہتے ہوئے صوبے کے عوام کی بھلائی کے لیے تمام ضروری اقدامات اٹھائے گی۔ میڈیا سے گفتگو کرتے ہوئے شزا فاطمہ نے گزشتہ 13 سالوں سے صوبے پر حکمرانی کرنے والوں کی کارکردگی پر شدید تنقید کی اور سوال اٹھایا کہ کے پی کے میں بنیادی صحت کی سہولیات، جدید ہسپتال، یونیورسٹیاں اور ڈیم کہاں ہیں؟ جن کی عدم موجودگی کے باعث مریضوں کو علاج کے لیے راولپنڈی کا رخ کرنا پڑتا ہے۔ انہوں نے مزید بتایا کہ مسلم لیگ (ن) کی پارلیمانی پارٹی کے اجلاس میں خیبر پختونخوا میں نافذ کی گئی ایمرجنسی، انتظامی معاملات اور اقوام متحدہ کے حالیہ اجلاس میں پاکستان کو ملنے والی سفارتی کامیابیوں پر تفصیلی تبادلہ خیال کیا جائے گا۔