انٹرنیٹ کی بہتری سے تعلیم و صحت میں انقلاب آئے گا: شزا فاطمہ

وفاقی وزیرِ انفارمیشن ٹیکنالوجی شزا فاطمہ خواجہ نے کہا ہے کہ ڈیجیٹل پاکستان وزیراعظم شہباز شریف کا وژن ہے اور معیاری انٹرنیٹ کی فراہمی سے تعلیم و صحت کے شعبوں میں انقلاب آئے گا۔ یورپی یونین پاکستان بزنس فورم سے خطاب کرتے ہوئے انہوں نے واضح کیا کہ حکومت کو انٹرنیٹ بند کرنے کا کوئی شوق نہیں اور نہ ہی ان کے پاس ایسا کوئی اختیار ہے۔ شزا فاطمہ نے بتایا کہ 2016 میں 3G اور 4G کے آغاز کے بعد سے موبائل صارفین کی تعداد میں مسلسل اضافہ ہو رہا ہے، جبکہ اب فائیو جی (5G) ٹیکنالوجی متعارف کرانے کی تیاریاں جاری ہیں جس سے آن لائن کاروبار کو مزید وسعت ملے گی۔ انہوں نے کیش لیس معیشت کی اہمیت پر زور دیتے ہوئے کہا کہ ڈیجیٹل نظام سے شفافیت بڑھے گی اور مالیاتی دھوکہ دہی کے امکانات کم ہوں گے۔