اسحاق ڈار کا ملائیشین وزیر خارجہ سے رابطہ، تجارت، اقتصادی تعاون بارے گفتگو

نائب وزیراعظم و وزیرِ خارجہ سناتور اسحاق ڈار اور ملائیشیا کے وزیرِ خارجہ داتو سری محمد حسن کے درمیان اہم ٹیلی فونک رابطہ ہوا ہے، جس میں پاکستان اور ملائیشیا کے دوطرفہ تعلقات کو مزید وسعت دینے پر تفصیلی بات چیت کی گئی۔ ترجمان دفترِ خارجہ کے مطابق دونوں وزرائے خارجہ کی گفتگو میں خصوصی طور پر تجارت، سرمائے کاری اور اقتصادی شعبوں میں باہمی تعاون کو فروغ دینے کے عملی اقدامات پر توجہ مرکوز کی گئی۔

ترجمان کے مطابق گفتگو کے دوران دونوں رہنماؤں نے اس بات پر زور دیا کہ پاکستان اور ملائیشیا کے دیرینہ دوستانہ تعلقات کو زیادہ سے زیادہ مضبوط اور فعال بنانے کے لیے اعلیٰ سطحی مسلسل روابط اور مشاورت کا سلسلہ انتہائی ضروری ہے۔ دونوں جانب سے اقتصادی و تجارتی شراکت داری کو نئی بلندیوں پر لے جانے کے عزم کا اعادہ کیا گیا۔

علاوہ ازیں، وزرائے خارجہ نے علاقائی و عالمی امور پر ہم آہنگی برقرار رکھنے کے لیے اقوامِ متحدہ کی جنرل اسمبلی کے ۸۱ویں اجلاس کے موقع پر نیویارک میں باضابطہ طور پر بالمشافہ ملاقات کرنے پر بھی اتفاق کیا۔ اس رابطے سے دونوں برادر اسلامی ممالک کے درمیان اقتصادی تعلقات اور سفارتی تعاون مزید گہرا ہونے کی توقع ہے۔