ایندھن سبسڈی، قومی سٹیئرنگ کمیٹی کا اجلاس، فیول ریلیف سکیم پر عملدرآمد کا جائزہ

نائب وزیراعظم و وزیرِ خارجہ سناتور اسحاق ڈار کی زیرِ صدارت ایندھن سبسڈی کے متعلق قومی سٹیئرنگ کمیٹی کا اہم اجلاس منعقد ہوا، جس میں ‘وزیراعظم خصوصی فیول ریلیف سکیم’ پر عملدرآمد کے مراحل کا تفصیلی جائزہ لیا گیا۔ اجلاس کے دوران حکام نے بریفنگ دیتے ہوئے بتایا کہ ملک بھر میں ایندھن (فیول) کے بیشتر سٹیشنز اب مرکزی ڈیجیٹل سسٹم پر مکمل طور پر فعال ہو چکے ہیں، جبکہ مستحق افراد کی سہولت کے لیے ۹۷۷۱ پر ایس ایم ایس (SMS) کے ذریعے رجسٹریشن کا عمل کامیابی سے جاری ہے۔

اجلاس میں انٹرنیٹ کی سہولت سے محروم علاقوں میں قائم ایندھن سٹیشنز کے لیے ایس ایم ایس سروس کے ذریعے فیول ٹوکنز ریڈیم (Redeem) کرنے کی باضابطہ منظوری دی گئی۔ اس فیصلے کے تحت آزاد جموں و کشمیر، گلگت بلتستان اور تمام صوبائی حکومتیں انٹرنیٹ کی سہولت سے محروم سٹیشنز کی تفصیلی فہرستیں فراہم کریں گی۔ علاوہ ازیں، سٹیٹ بینک آف پاکستان کی جانب سے بریفنگ میں بتایا گیا کہ گزشتہ تین روز کے دوران موصول ہونے والے تمام ادائیگی کے دعوے مکمل طور پر نمٹا دیے گئے ہیں اور مالیاتی عمل ہموار طریقے سے جاری ہے۔

نائب وزیراعظم اسحاق ڈار نے متعلقہ حکام کو سخت ہدایت جاری کرتے ہوئے کہا کہ ہر کھلے اور فعال فیول سٹیشن کو بلا تاخیر سسٹم میں شامل کیا جائے، جبکہ مستقل طور پر بند یا صرف ڈیزل فروخت کرنے والے سٹیشنز کو اس فہرست سے خارج کیا جائے۔ اسحاق ڈار نے زور دیا کہ فیول ریلیف کی شفاف اور بلا رکاوٹ فراہمی ہر صورت مستحق افراد تک یقینی بنائی جائے۔ انہوں نے اسکیم کو کامیاب بنانے پر صوبائی انتظامیہ اور سٹیٹ بینک آف پاکستان کی کاوشوں کی تعریف کی۔