’آپ کا کیمرا، آپ کا سرکس‘ شان شاہد کا ٹک ٹاکرز کی شوبز میں آمد پر سخت ردعمل

نامور پاکستانی اداکار، ہدایت کار اور مصنف شان شاہد نے سوشل میڈیا انفلوئنسرز کی مین اسٹریم شوبز انڈسٹری میں آمد پر تحفظات کا اظہار کرتے ہوئے کہا ہے کہ ڈیجیٹل پلیٹ فارمز پر ملنے والی عارضی اور فوری شہرت کسی پائیدار فنّی کیریئر کی ضامن نہیں ہو سکتی۔ دنیا ڈیجیٹل کے معروف پروگرام ’دی اینکر مین‘ میں علی سہیل کو دیے گئے خصوصی پوڈ کاسٹ انٹرویو میں شان شاہد نے پاکستانی ڈراما اور فلم انڈسٹری کے بدلتے رجحانات اور ٹک ٹاکرز و یوٹیوبرز کو کاسٹ کیے جانے پر سیر حاصل گفتگو کی۔

شان شاہد کا کہنا تھا کہ وہ کسی کی کاسٹنگ یا پیشہ ورانہ فیصلوں کا تعین تو نہیں کر سکتے کیونکہ ہر پروڈیوسر اور اداکار کو اپنے فیصلوں کا حق حاصل ہے، تاہم انہوں نے اس بات پر زور دیا کہ اداکاری ایک مستقل مزاجی اور محنت طلب فن ہے۔ انہوں نے سوال اٹھایا کہ کیا محض آن لائن فارمیٹ میں وائرل ہونا اور فالوورز کا ہونا اداکاری کی بنیاد بن سکتا ہے؟ انہوں نے نئے آنے والوں کو مشورہ دیا کہ وہ سوشل میڈیا کی عارضی شہرت پر انحصار کرنے کے بجائے اپنے فن کو سیکھنے اور محنت پر توجہ دیں۔