عالمی پاپ آئیکون شکیرا کا بھارت میں ہونے والا کنسرٹ ملتوی

ممبئی: گریمی ایوارڈ یافتہ عالمی پاپ آئیکون شکیرا کے بھارتی مداحوں کے لیے ویک اینڈ پر افسوسناک خبر سامنے آئی ہے، جس کے مطابق بھارت میں ان کے طے شدہ کنسرٹس کو غیر معینہ مدت کے لیے ملتوی کر دیا گیا ہے۔ بھارتی میڈیا رپورٹس کے مطابق، یہ فیصلہ موجودہ جغرافیائی سیاسی صورتحال اور خطے میں بڑھتی ہوئی کشیدگی کے پیشِ نظر کیا گیا ہے۔

سوشل میڈیا پلیٹ فارم انسٹاگرام پر جاری کردہ ایک سرکاری بیان میں کنسرٹ کی انتظامیہ نے واضح کیا کہ شکیرا کے کنسرٹس کو آئندہ اعلان تک ملتوی کیا جا رہا ہے۔ بیان میں مزید کہا گیا ہے کہ “مداحوں، آرٹسٹ اور پروڈکشن ٹیم کی سلامتی ہماری اولین ترجیح ہے، اور موجودہ حالات میں بڑے عوامی اجتماعات کا انعقاد خطرے سے خالی نہیں ہے”۔

انتظامیہ کا کہنا ہے کہ وہ حالات کا جائزہ لے رہے ہیں اور کنسرٹ کے لیے نئی تاریخوں کی تلاش جاری ہے، جن کا اعلان صورتحال معمول پر آنے کے بعد کیا جائے گا۔ یاد رہے کہ شکیرا کے اس دورے کا مداحوں کو بے صبری سے انتظار تھا، تاہم علاقائی عدم استحکام نے شوبز کی سرگرمیوں کو بھی متاثر کر دیا ہے۔