شہناز گل پاکستانی ڈرامے کے او ایس ٹی کی مداح نکلیں

بھارتی شوبز انڈسٹری کی معروف اداکارہ، ماڈل اور میزبان شہناز گل نے بگ باس 13 میں شرکت کے بعد غیر معمولی شہرت حاصل کی۔ شو میں مرحوم اداکار سدھارتھ شکلا کے ساتھ ان کی آن اسکرین کیمسٹری نے انہیں سوشل میڈیا اسٹار بنا دیا، اور آج بھی یہ جوڑی مداحوں کے دلوں میں خاص مقام رکھتی ہے۔

شہناز گل اس وقت بالی ووڈ کی مقبول اداکاراؤں میں شمار ہوتی ہیں اور انسٹاگرام پر ان کے فالوورز کی تعداد 19.3 ملین سے تجاوز کر چکی ہے۔ وہ فلموں، میوزک ویڈیوز اور مختلف ڈیجیٹل پراجیکٹس میں متحرک نظر آتی رہتی ہیں۔

حال ہی میں شہناز گل نے ایک ویڈیو شیئر کی جس میں وہ پاکستان کے مقبول ڈرامے کے او ایس ٹی “میری زندگی ہے تو” پر پرفارم کرتی دکھائی دیں۔ ویڈیو کے کیپشن میں انہوں نے لکھا کہ وہ اس گانے کی دیوانی ہیں اور خود سے بھی زیادہ اس سے محبت کرتی ہیں۔ یہ او ایس ٹی معروف پاکستانی گلوکار عاصم اظہر نے گایا ہے، جنہوں نے شہناز گل کی ویڈیو پر تبصرہ کرتے ہوئے گانے کی تعریف بھی کی۔

سوشل میڈیا پر اس ویڈیو اور گانے کو بھرپور پذیرائی مل رہی ہے، جبکہ پاکستانی اور بھارتی صارفین دونوں شہناز گل کے اس انداز کو خوب سراہ رہے ہیں۔