شاہنواز زیدی نے 10 سال بعد پہلی اہلیہ کی یاد اور دوسری شادی کی ان کہی کہانی سنا دی

کراچی: پاکستان کے معروف اداکار، شاعر، مصور اور سابق پروفیسر شاہ نواز زیدی نے ایک مارننگ شو کے دوران اپنی ازدواجی زندگی، پہلی اہلیہ کی بیماری اور ان کے انتقال کے بعد پیدا ہونے والی تنہائی پر کھل کر گفتگو کی ہے۔

شاہ نواز زیدی نے بتایا کہ ان کی پہلی شادی 24 برس کی عمر میں محبت کی بنیاد پر ہوئی تھی۔ انہوں نے انکشاف کیا کہ شادی سے قبل ہی ان کی اہلیہ نے فون پر روتے ہوئے بتایا تھا کہ وہ شدید ذیابیطس (ڈائیبیٹیز) کی مریضہ ہیں اور انہیں شادی کے فیصلے پر دوبارہ سوچنا چاہیے، تاہم انہوں نے رشتہ ختم کرنے کے بجائے ساتھ نبھانے کا فیصلہ کیا۔ دونوں نائروپی منتقل ہوئے اور ان کے چھ بچے بھی ہوئے۔

اداکار نے بتایا کہ ذیابیطس کی شدید پیچیدگیوں کے باعث ان کی پہلی اہلیہ کا انتقال ہو گیا، جس نے انہیں اندر سے توڑ کر رکھ دیا اور وہ شدید ذہنی انتشار اور ڈپریشن کا شکار ہو گئے۔ اہلیہ کی وفات کے چار سال بعد تک انہوں نے دوسری شادی کے بارے میں سوچا بھی نہیں تھا لیکن تنہائی کے باعث زندگی بکھرتی محسوس ہونے لگی۔

انہوں نے بتایا کہ بعد ازاں ان کی ملاقات ایک ایرانی نژاد خاتون سے ہوئی جو ان سے عمر میں کافی کم تھیں۔ پہلے دوستی اور پھر محبت کے بعد دونوں نے شادی کا فیصلہ کر لیا۔ شاہ نواز زیدی کا کہنا تھا کہ ان کی دوسری شادی کو اب 10 سال کا عرصہ گزر چکا ہے اور ان کے درمیان محبت و احترام کا رشتہ مضبوط سے مضبوط تر ہو رہا ہے۔