پٹرول کی قیمت میں 55 روپے اضافہ، شفاعت علی کا حکومت کو اہم مشورہ

پاکستان میں پٹرول کی قیمت میں حالیہ اضافے پر ردعمل دیتے ہوئے معروف میزبان اور کامیڈین شفاعت علی نے حکومت کی پالیسیوں پر سخت تنقید کی اور ایک متبادل تجویز پیش کی۔

شفاعت علی نے کہا کہ بڑھتی مہنگائی اور ایندھن کی قیمتوں کے پیشِ نظر حکومت دفاتر کے نظام پر نظرِ ثانی کرے۔ انہوں نے سوشل میڈیا پر اپنے پیغام میں کہا کہ اگر پٹرول 321 روپے فی لیٹر تک پہنچ چکا ہے تو بہتر حل یہ ہے کہ دفاتر عارضی طور پر بند کیے جائیں اور کورونا وبا کے دوران نافذ کی گئی ‘ورک فرام ہوم’ پالیسی کو دوبارہ فعال کیا جائے تاکہ لوگوں کو روزانہ سفر کے اخراجات سے ریلیف مل سکے۔

انہوں نے کہا:”321 روپے کا پیٹرول بیچنے سے بہتر ہے کہ حکومت تمام دفاتر بند کرے اور کرونا کی طرح ورک فرام ہوم نافذ کرے۔ ایک آدمی جس کی چالیس ہزار تنخواہ ہو، وہ اپنا گردہ بیچ کر بھی سکول اور دفتر تک موٹر سائیکل کا پیٹرول پورا نہیں کر سکتا۔ پچپن روپے کا ایک لمحے میں اضافہ ظلم ہے۔”شفاعت علی نے عوام کی مشکلات پر بھی روشنی ڈالی اور کہا کہ کم آمدنی والے افراد کے لیے روزمرہ زندگی کے اخراجات بھی پورے کرنا مشکل ہو گیا ہے۔ انہوں نے پٹرول میں اچانک 55 روپے فی لیٹر اضافے کو عوام پر براہِ راست بوجھ ڈالنے والا قدم قرار دیا اور کہا کہ ایسے حالات میں حکومت کو عملی اقدامات کے ذریعے عوام کو ریلیف فراہم کرنا ناگزیر ہے۔